Rétt forgangsröðun ríkisstjórnarflokkanna?

Nú hillir undir lok lengsta sumarþings í áratugi. Lengd þingsins ætti ekki að koma neinum á óvart enda verkefnin ærin. Hins vegar er forgangsröðun ríkisstjórnarflokkanna ansi undarleg miðað við ástand mála í samfélaginu. Skipta má sumarþinginu í þrjá kafla. Á því fyrsta gerðist ansi lítið enda verið að bíða eftir stóra málinu sem einkenndi annan kafla,  ESB málið. Þriðji kaflinn klárast væntanlega á næstu dögum, Icesavekaflinn.

Skuldastaða íslenskra heimila hefur versnað gríðarlega og vanskil aukist vegna gengisfalls krónunnar, lækkunar launa, atvinnuleysis, verðbólgu og hárra vaxta. Á þessu sumarþingi hefur ríkisstjórnin ekki lagt fram nein mál varðandi skuldastöðu heimlanna.

 

Sjálfstæðismenn lögðu fram í sumarbyrjun metnaðarfullar tillögur til aðgerða vegna stöðu efnahagsmála. Tillögurnar eru viðamiklar og ganga varðandi heimilin í megindráttum út á það að viðurkennt verði að forsendubrestur hafi orðið hjá skuldurum við hrun fjármálakerfisins og því verði að grípa til aðgerða til að koma í veg fyrir að einstaklingar og fjölskyldur missi heimili sín vegna tímabundinna fjárhagserfiðleika.  Athygli vekur að tillögurnar hafa verið svæfðar í efnahags- og skattanefnd. Jafnframt hefur stjórnarþingmaðurinn Lilja Mósesdóttir sem lagði fram frumvarp til laga um breytingu á lögum um samningsveð mátt þola sömu svæfingarmeðferð.

    

Mikilvægt er að fulltrúar allra flokka komi saman að borðinu líkt og tillögur sjálfstæðismanna gera ráð fyrir.  Slíkt verklag er vænlegast til árangurs í máli af þeirri stærðargráðu sem hér um ræðir. 

 

Ríkisstjórnarflokkarnir geta ekki endalaust komist upp með að vísa til þess að þeir beri ekki ábyrgð á vandanum heldur fyrri ríkisstjórnir og skýla sér með því bak við annarra manna ábyrgð. Vinstri grænir og Samfylkingin hafa haldið um stjórnartaumana frá því í febrúar.  Aðgerðarleysiskostnaður vegna úrræðaleysis ríkisstjórnarflokkanna eykst dag frá degi.

Staðreyndin er sú að staða heimilanna hefur versnað til muna meðan þingið ræðir ESB og Icesave.

 

 

Þrátt fyrir allt er hvergi betra að búa en á Íslandi. Hér eru landgæði mikil, falleg náttúra, gnægð af hreinu fersku vatni og náttúruauðlindir til lands og sjávar miklar. Grunnstoðir samfélagsins eru sterkar, menntunarstig hátt og aldurssamsetning þjóðarinnar sérstaklega hagstæð.  Í þessum gæðum felast okkar sóknarfæri til framtíðar.

 

ASÍ: Bregðast þarf við vanda heimilanna